BO CAMIÑO - Etapa 24

Ola, chicos e chicas!

Quería agradecervos novamente as mensaxes de ánimo. Só faltan 3 semanas para chegar a Santiago de Compostela!

A semana pasada coñecín VILALBA e durmín no seu PARADOR. Fixádevos que habitación máis bonita:

A clase de 5 anos preguntoume moitas cousas da miña habitación no castelo.

Por sorte non había nin arañas nin ratas. O que había era unha cama mooooi cómoda!

E si, durmo cun peluche. Aí o tedes, enriba da cama. Gústavos?

Como levo un teléfono móbil, aí xa podo ver o calendario.

Para Infantil:

1. Que nome podo poñerlle ao meu osiño de peluche?

2. Que mascota teriades vós se vivísedes nun castelo?

 

Para Primaria:

3. Hai algo na foto que non debería estar aí? Razoa a túa resposta.

4. Despois de Vilalba, cal cres que é a seguinte localidade na que teño que parar? (podes buscar por Internet. Pensa que en cada etapa podo camiñar entre 20 e 30 quilómetros).

Escribe o NOME e o CURSO no comentario.

BO CAMIÑO - Etapa 23

Só faltan unhas poucas etapas para que Dona Disparate chegue ao seu destino: Santiago de Compostela.

Tiñan curiosidade os compañeiros da clase de Infantil 5 anos por onde durmía Dona Disparate no seu percorrido. Normalmente durme nos albergues que hai no camiño, pero nesta ocasión decidiu hospedarse nun Parador. E elixiu unha habitación que está nesta torre medieval:

Para Infantil:

1. Como imaxinas que será a habitación onde durme Dona Disparate?

 

Para Primaria:

2. Que nome ten a localidade onde está Dona Disparate?

3. Podes explicar que é un Parador?

Pon NOME e CURSO no teu comentario.

BO CAMIÑO - Etapa 22

Dona Disparate continúa o seu camiño a Santiago de Compostela, con máis ánimo que nunca despois das vosas mensaxes e da parada que fixo no colexio.

Nesta etapa Dona Disparate está a pouco máis de 20 quilómetros de San Miguel de Reinante... ¿Coñecedes este lugar?

Para Infantil:

1. Neste sitio realízase en agosto un mercado medieval... Que podes contarnos da época dos castelos?

 

Para Primaria:

2. Que nome ten a localidade onde está Dona Disparate?

3. Investiga un pouco e di a quen representa esa estatua que está sentada no banco.

4. Neste lugar naceu o autor da música do Himno galego. Sabes quen é?

 

Non esquezas NOME e CURSO no comentario.

CREAcción no Camiño: "De libros por Barreiros"

Durante este curso, dentro do noso proxecto "BO CAMIÑO", estamos coñecendo as etapas, lugares e monumentos do Camiño do Norte da man de Dona Disparate. Cada semana publica unha foto no blog e propón varios retos para o alumnado e as familias.

O 23 de abril, o día do Libro, coincidiu coa etapa na que Dona Disparate pasaba por Barreiros. Aproveitou para facer unha pequena parada no cole e deixarnos unha mensaxe e uns libros de agasallo xa que era o seu aniversario.

Para celebrar este día tan especial, decidimos relacionar o noso proxecto "Bo Camiño" co lema deste curso das Bibliotecas Escolares de Galicia, "Xeografías Lectoras na Biblioteca Escolar", para elaborar un mapa de Barreiros. O alumnado seleccionou os libros que están configurando as xeografías lectoras de cada clase durante este curso e reproduciu as súas portadas. Con estes debuxos completamos as diferentes parroquias lectoras de Barreiros.

Como remate desta celebración, baixamos ao patio (seguindo as medidas sanitarias) e compartimos estas lecturas nunha xuntanza moi orixinal que inmortalizamos co noso dron:

Grazas aos libros descubrimos os mundos marabillosos que agochan as súas páxinas, pero tamén coñecemos mellor a nosa contorna e aprendemos a valorala.

 

Por certo, Dona Disparate está moi contenta de que vos gustaran os agasallos que fixo polo Día do Libro. O próximo venres teredes novas fotos e retos!

Día do Libro 2021

 Hoxe celebramos o...

DÍA DO LIBRO

E Dona Disparate sorprendeunos cun vídeo que gravou cando pasou polo colexio!

Agradeceu moito as vosas mensaxes de ánimo e que participedes nos retos semanais.

Tamén aproveitou para deixarnos uns agasallos xa que hoxe é o seu aniversario.

Moitas grazas, Dona Disparate!

Bo camiño!

BO CAMIÑO - Etapas 19 e 20

Bo día!

Dona Disparate está ben, soamente tardou un pouco máis en enviar fotos porque quedou sen batería no móbil e, como é tan despistada, nin se dera conta.

Cando cargou a batería leu todas as vosas mensaxes de ánimo e enviounos estas fotos:

Nesta etapa Dona Disparate está na desembocadura dun pequeno río que separa os concellos asturianos de El Franco e Tapia de Casariego.

Alí hai un esteiro (zona de costa onde desemboca un río e que queda cuberta pola preamar) no que Dona Disparate aproveitou para merendar e descansar un pouco.

 

Para Infantil:

1. Na primeira foto hai un aparello moi divertido que podemos atopar nos parques infantís. Que é?

2. Cales son os teus xogos favoritos dos parques infantís?

 

Para Primaria:

3. Coas pistas que tes máis arriba, sabes onde está Dona Disparate?

4. Que cres que debería facer Dona Disparate cando chegue a Barreiros?

 

Non esquezas NOME e CURSO no comentario.

Sen novas de Dona Disparate

 Esta semana non sabemos nada de Dona Disparate...

Non chegou ningunha foto, ningún e-mail...

Estará ben? Pasaríalle algo? Terá algún problema?

BO CAMIÑO - Etapa 18

OS NENOS E NENAS DE 5 ANOS QUEREN SABER ALGUNHAS COUSAS DE DONA DISPARATE. ISTO FOI O QUE DIXO:

- CANDO É O TEU CUMPLE? 

OLA, NENOS E NENAS DE 5 ANOS!

O MEU CUMPLE É O 23 DE ABRIL, O DÍA DO LIBRO.

CO QUE ME GUSTAN OS LIBROS, É UNHA CASUALIDADE, VERDADE?

- TES MÓBIL OU TABLET OU ORDENADOR PARA VER AS NOSAS MENSAXES?

LEVO SEMPRE UN MÓBIL COMIGO, POR SE TEÑO ALGUNHA URXENCIA. TODAS AS SEMANAS LEO OS VOSOS COMENTARIOS E AS VOSAS MENSAXES DE ÁNIMO.

MOITÍSIMAS GRAZAS!

EN POUCAS SEMANAS CHEGAREI A GALICIA!!!

 

Aquí está a foto desta semana:

 

Para Infantil:

1. O barco de Dona Disparate non ten velas. Como pode funcionar?

2. Na foto aparece unha vila ou unha cidade?

 

Para Primaria:

3. Dona Disparate está nunha localidade que en asturiano chámase "CUIDEIRU". Sabes o nome en castelán?

4. Poderías dicir o xentilicio da xente deste lugar (lembra que xentilicio é un adxectivo que indica o lugar de orixe).

 

Escribe NOME e CURSO no comentario.

Na etapa anterior, a 17, Dona Disparate estaba en AVILÉS, visitando un edificio do CENTRO NIEMEYER, que leva o nome do arquitecto que o deseñou.

Os compañeiros e compañeiras de infantil teñen moita imaxinación! Na etapa anterior Vega imaxinaba que no edificio podía vivir un fareiro. Tamén poderían vivir superheroes ou ser o Centro de mando da Patrulla canina, co tobogán polo que baixan os cans. Parécense, non si?

Tamén propuxeron a Dona Disparate menús moi saudables e variados:

- Ensalada mixta, merluza á galega e de postre mazá [Cecilia].

- Guisantes con xamón, peituga de polo con ensalada e patacas e de postre fresas [Vega].

- Lentellas ou puré de calabaza, polo con ensalada ou peixe con patacas cocidas e de postre iogur ou froita (plátano, mazá, pera...) [Clase de 5 anos].