É tempo de entroido

E no tempo de entroido aproveitamos para escoitar estas dúas cancións baseadas nestes libros que temos na Biblioteca: "É tempo de entroido" e "Non pare a festa", de Ramón D. Veiga e David Sierra.

 

 

Este mes na biblio... Xogos de mesa

Comezamos a nova etapa da biblioteca con sorpresas.

Durante cada mes teremos unha nova proposta relacionada co proxecto de Biblioteca Creativa. Nesta ocasión con xogos de mesa. Durante esta semana o alumnado de 3º, 4º, 5º e 6º poderá poñer en práctica as súas habilidades de lóxica, razoamento, concentración, planificación, creatividade, dedución... e tamén o cooperativismo e o compañeirismo.

 

NOVA BIBLIOTECA

No CEIP San Miguel de Reinante-Barreiros estamos de estrea.

Despois de varios meses de obras, reformas, pintura, compras e traslados, por fin podemos inaugurar a nosa nova biblioteca.

A partir desta semana cada grupo virá na súa hora de lectura asignada a facer os préstamos de libros para levar a casa. E a partir da próxima semana comezaremos a planificar actividades para sacarlle o máximo partido a este novo espazo!

 

Na nova biblioteca temos diferentes espazos e recursos.

Zona de ordenadores

Pantalla Interactiva

 

Impresora 3D e portátiles

 

Robótica

Recuncho do Proxecto "Rumbo ao mar"

Zona de lectura

 

 

Zona de préstamos e devolucións

Moble de novidades

 

E para rematar, habilitamos un pequeno recuncho fóra da Biblioteca para xogos e unha lectura máis relaxada.

Desexamos que esteades a gusto nela!

Moi pronto haberá máis novidades, estade atentos...

Rumbo ás recomendacións lectoras!

Chega o inverno, coas tan esperadas vacacións, e chegan tamén as tradicionais recomendacións lectoras. E non só lectoras. Nestes días temos tempo de ler, pero tamén de cociñar, de xogar, de informarnos, de escoitar música, de contar historias, de descubrir cousas...

 

Dona Disparate convídanos a entrar na súa casa. Adiante!

Podes ampliar facendo clic nos 3 puntos ⬆ e nas frechas.

E lembra: mercando nas librerías e tendas pequenas axudamos ao noso comercio local.

 

Felices festas!

Biblioteca Creativa

Na Biblioteca do CEIP San Miguel de Reinante-Barreiros estamos de celebración. Acaban de seleccionarnos como centro de nova incorporación ao proxecto de BIBLIOTECA CREATIVA!

A partir do 2º trimestre, trala inauguración da nova biblioteca, converteremos este espazo nun lugar de investigación, experimentación, cooperación e creación...

Continuade atentos ao blog, moi pronto teredes máis novas.

Cabazas de Samaín 2021

Aquí está a exposición virtual de cabazas que preparou o equipo de Dinamización da Lingua Galega do cole coas vosas fotos. Vaia artistas!

 

Samaín 2021

Achégase a celebración do Samaín e os Bolechas propóñennos algúns materiais para ler, colorear, decorar e ata cociñar. Todo relacionado co SAMAÍN!

E se vos animades a ir casa por casa buscando "terroríficos" libros, aquí tedes unha Aventura lectora no Samaín. Seguro que coñecedes a todas estas personaxes...

Mensaxe de Dona Disparate: RUMBO AO MAR!

Hoxe celebramos o día das Bibliotecas e, casualidade, chegaron ao cole unhas botellas cunha mensaxe dentro. Adiviñades quen as enviou?

Si, Dona Disparate!!! 

 Mirade, mirade, dentro da botella está a mensaxe!

Aquí está o que nos contaba:

Ola, nenos e nenas! Son Dona Disparate!
Este curso embarquei nunha aventura que me levará por todos os mares do mundo! Queredes ser os meus grumetes nestas viaxes? Animádevos, xuntos coñeceremos sorprendentes criaturas mariñas, lugares fantásticos ou misteriosas illas perdidas. Tamén descubriremos todo o dano que fixo o ser humano ao mar e xuntos conseguiremos un mar máis limpo.
Os nosos barcos serán os libros, claro, e por iso preparei unhas mochilas con libros marabillosos. Tamén teredes novos pasaportes lectores para que apuntedes cada novo libro que leades.
Como vedes, hoxe comunícome con vós mediante esta mensaxe na botella. Nalgúns lugares non poderei usar o móbil nin internet, así que terei que buscar distintas formas de contarvos os meus descubrimentos.
E agora déixovos, que teño que preparar as velas do meu barco para comezar esta nova aventura! RUMBO AO MAR!

E coa mensaxe viñeron as mochilas viaxeiras, que poderedes telas en casa durante unha semana, e os préstamos semanais de libros.

Preparados para a aventura? Imos...

RUMBO AO MAR!