luns, 28 de setembro de 2026

DETECTIVES DA NATUREZA EN 2º DE PRIMARIA


O alumnado de 2º de Educación Primaria converteuse esta semana nun equipo de intrépidos investigadores sen saír da aula. Na clase de Ciencias Naturais, os rapaces e rapazas tiveron que resolver un gran misterio: descubrir a que especies pertencían unhas follas que lles apareceron na clase.
Para resolver o caso, estes pequenos detectives combinaron con grande éxito dúas ferramentas de investigación complementarias:
  • Utilizaron a aplicación Google Lens para escanear as follas coas tabletas e obter unha primeira identificación visual inmediata.
  • Para confirmar os seus descubrimentos, acudiron ás páxinas do magnífico libro "Inventario ilustrado das árbores" (Editorial Kalandraka). Alí analizaron as ilustracións e as características de cada especie.
Grazas a este traballo de campo na aula, demostraron que a tecnoloxía e os libros da biblioteca son os aliados perfectos para aprender experimentando e coidando o noso medio ambiente.

luns, 21 de setembro de 2026

COMEZA A AVENTURA "EUREKA"

Este luns o alumnado recibiu nas súas aulas unha carta moi especial de Pinchos. 
O noso ourizo aventureiro quería contarnos algo importante: xa temos novo proxecto para este curso!

“EUREKA: INVENTOS E DESCUBRIMENTOS" 



Durante os próximos meses converterémonos en inventores e inventoras, descubridores e descubridoras para investigar o mundo que nos rodea. 

- Descubriremos quen creou moitas das cousas que usamos cada día. 
- Veremos como cambiaron os inventos ao longo do tempo.
- Realizaremos experimentos para descubrir e aprender. 
- E tamén crearemos os nosos propios inventos! 

Temos por diante un curso cheo de curiosidade, investigación, experimentos e moita imaxinación. 


A aventura “Eureka” acaba de comezar! 


Estades preparados e preparadas para inventar, descubrir e sorprendervos?